ណូវែលហ្សេឡង់៖ ប្រទេសណូវែលហ្សេឡង់ នៅថ្ងៃទី៣០ ខែសីហានេះ បានរាយការណ៍នៅករណីដំបូងគេបង្អស់ ដែលអាជ្ញាធរបានអះអាងថា ជាករណីអ្នកស្លាប់ដែលពាក់ព័ន្ធនឹងការចាក់វ៉ាក់សាំងកូវីដ-១៩ Pfizer ដំបូងគេបង្អស់ក្នុងប្រទេសនេះ។

សេចក្តីរាយការណ៍នេះត្រូវបានប្រកាសដោយក្រសួងសុខាភិបាលណូវែលហ្សេឡង់ ក្រោយពីមានការត្រួតពិនិត្យយ៉ាងម៉ត់ចត់ដោយក្រុមការងារឯករាជ្យសម្រាប់ការតាមដានលើសុវត្ថិភាពវ៉ាក់សាំងកូវីដ-១៩ ក្រោយពីស្រ្តីម្នាក់បានស្លាប់ក្រោយទទួលវ៉ាក់សាំងកូវីដ-១៩ ប្រភេទ Pfizer។ យ៉ាងណាក្តី ក្រសួងសុខាភិបាលណូវែលហ្សេឡង់ មិនបានបញ្ជាក់ឱ្យដឹងថាស្រ្តីដែលបានស្លាប់នោះមានវ័យប៉ុន្មាននោះឡើយ។

គណៈកម្មការឯករាជ្យបានបញ្ជេញរបាយការណ៍របស់ខ្លួនថា ស្រ្តីនោះបានស្លាប់ដោយសារអាការៈ myocarditis ដែលពាក់ព័ន្ធទៅបញ្ហាចង្វាក់បេះដូង ដែលជាផលប៉ះពាល់ដ៏កំរកើតមាននៃវ៉ាក់សាំងកូវីដ-១៩ ប្រភេទ Pfizer នេះ។

ដោយឡែក ក្រុមការងារនៃក្រុមហ៊ុនវ៉ាក់សាំង Pfizer នៃប្រទេសណូវែលហ្សេឡង់ នៅមិនទាន់មានការឆ្លើយតបណាមួយ ជុំវិញបញ្ហាខាងលើនេះឡើយ។

គណៈកម្មការឯករាជ្យសម្រាប់តាមដានសុវត្ថិភាពវ៉ាក់សាំងកូវីដ-១៩ ក៏បានទទួលស្គាល់ដែរថា វ៉ាក់សាំងបង្ការកូវីដ-១៩​ ប្រភេទ Pfizer ពិតជាមានគុណភាពខ្ពស់សម្រាប់ការបង្ការជំងឺកូវីដ-១៩ ប៉ុន្តែយ៉ាងណាមិញ ហានិភ័យប្រឈមទៅនឹងផលប៉ះពាល់ក៏មានច្រើនដែរ ជាពិសេសលើបញ្ហា myocarditis តែម្តង។

គួរបញ្ជាក់ថា ក្នុងប្រទេសណូវែលហ្សេឡង់ រដ្ឋាភិបាលប្រទេសនេះបានអនុម័តទៅលើការប្រើប្រាស់វ៉ាក់សាំងកូវីដ-១៩ សម្រាប់ចាក់ជូនប្រជាជនខ្លួនចំនួន ៣ប្រភេទរួមមាន Pfizer-BioNTech, Janssen និង AstraZeneca៕